ဆောက်လုပ်ရေးလုပ်ငန်း စိစစ်ညှိနှိုင်းရေးအဖွဲ့(ငွေလုံးငွေရင်း) ၏ (၁/၂၀၂၂) လုပ်ငန်းညှိနှိုင်း အစည်းအဝေးကို ၂၀၂၂ ခုနှစ်၊ ဒီဇင်ဘာလ (၇)ရက် နေ့လယ်(၁၃:၃၀)နာရီအချိန်တွင် နေပြည်တော်၊ ဆောက်လုပ်ရေးဝန်ကြီးဌာန၊ စုဝေးခန်းမ၌ ကျင်းပပါသည်။

 အစည်းအဝေးသို့ ဆောက်လုပ်ရေးလုပ်ငန်း စိစစ်ညှိနှိုင်းရေးအဖွဲ့ (ငွေလုံးငွေရင်း) နှင့် တည်ဆောက်ရေးလုပ်ငန်း စိစစ်ရေးညှိနှိုင်းရေးကော်မတီ ဉက္ကဋ္ဌ ၊ ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးမျိုးသန့် ၊ ကော်မတီ ဒုတိယ ဥက္ကဋ္ဌများဖြစ်သည့် စီမံကိန်းနှင့်ဘဏ္ဍာရေး ဝန်ကြီးဌာန ၊ ဒုတိယဝန်ကြီး ဦးမောင်မောင်ဝင်း ၊ ဆောက်လုပ်ရေးဝန်ကြီးဌာန ၊ ဒုတိယဝန်ကြီး ဦးဝင်းဖေ ၊ ပြည်ထောင်စုအဆင့်ဗဟိုအဖွဲ့ အစည်းများနှင့် သက်ဆိုင်ရာ ပြည်ထောင်စု ဝန်ကြီးဌာန များမှ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ ဦးဆောင်ညွှန်ကြားရေးမှူးများနှင့် ဌာနဆိုင်ရာ တာဝန်ရှိသူများ တက်ရောက်ကြပါသည်။

 အစီအစဉ်အရ ဆောက်ရေးလုပ်ငန်း စိစစ်ညှိနှိုင်းရေးအဖွဲ့(ငွေလုံးငွေရင်း) နှင့် တည်ဆောက် ရေးလုပ်ငန်း စိစစ်ရေးညှိနှိုင်းရေးကော်မတီ ဉက္ကဋ္ဌ ၊ ဆောက်လုပ်ရေးဝန်ကြီးဌာန၊ ပြည်ထောင်စု ဝန်ကြီး ဦးမျိုးသန့် က အဖွင့်အမှာစကားပြောကြားရာတွင် ယနေ့အစည်းအဝေးသည် တည်ဆောက် ရေးလုပ်ငန်းများ အရည်အသွေးပြည့်မီစွာဖြင့် အချိန်မီပြီးစီးရေးအတွက် ဘဏ္ဍာရေး ဆိုင်ရာ လုပ်ထုံးလုပ်နည်းများ ၊ စည်းမျဉ်းစည်းကမ်းများ ၊ ညွှန်ကြားချက်များနှင့်အညီ လိုက်နာ ဆောင်ရွက် နိုင်ရန် ရည်ရွယ်၍ ပြည်ထောင်စုအဆင့်ဗဟိုအဖွဲ့အစည်းများနှင့် သက်ဆိုင်ရာ ပြည်ထောင်စုဝန်ကြီး ဌာနများ နှင့် လုပ်ငန်းညှိနှိုင်းအစည်းအဝေး ကျင်းပပြုလုပ်ခြင်းဖြစ်ပါကြောင်း။

 နိုင်ငံတော်စီမံအုပ်ချုပ်ရေးကောင်စီရုံး၏ လမ်းညွှန်ချက်နှင့်အညီ နိုင်ငံတော်ဘဏ္ဍာငွေများ လေလွင့်ဆုံးရှုံးမှုမရှိစေရန်နှင့် အသုံးစရိတ်များ ဟန်ချက်ညီညီ ဆောင်ရွက်နိုင်ရန် စီမံကိန်းနှင့် ဘဏ္ဍာရေးဝန်ကြီးဌာန၏ ဘဏ္ဍာရေးဆိုင်ရာ ညွှန်ကြားချက်များကို ပြည်ထောင်စုအဆင့် အဖွဲ့အစည်းများ ၊ သက်ဆိုင်ရာဝန်ကြီးဌာနများအနေဖြင့် အထူးအလေးထား လိုက်နာဆောင်ရွက်ရန် လိုပါကြောင်း။

 ၂၀၂၃ - ၂၀၂၄ ဘဏ္ဍာရေးနှစ် တည်ဆောက်ရေးလုပ်ငန်းများ လျာထားရာတွင် လုပ်ငန်း စီမံကိန်းများ (Projects) နှင့် လုပ်ငန်းများ (Works) ဆိုပြီး နှစ်ပိုင်းရှိသည့်အပြင် မဟာဗျူဟာမြောက် လုပ်ငန်းစီမံကိန်းများ ၊ Project Bank တွင် လျာထားမည့် လုပ်ငန်းစီမံကိန်းများ ပါဝင်ပါကြောင်း၊ လုပ်ငန်းစီမံကိန်းများ အားလုံးကို Myanmar Sustainable Development Plan နှင့် ချိတ်ဆက်ပြီး ဆောင်ရွက်လျက်ရှိသည့်အတွက် တည်ဆောက်ရေးလုပ်ငန်းများကို လျာထားရာတွင် လုပ်ငန်း စီမံကိန်းသစ် ၊ ဆောင်ရွက်ဆဲလုပ်ငန်း စီမံကိန်းများဖြင့် ခွဲခြားဖော်ပြပြီး မိမိတို့ဝန်ကြီးဌာနများမှ ခွဲဝေရရှိထားသော ငွေလုံးငွေရင်း အသုံးစရိတ်ဘောင်အတွင်းမှ လျာထားဆောင်ရွက်ရမှာဖြစ် ကြောင်း ပြောကြားပါသည်။

 ၎င်းနောက် ကော်မတီ ဒုတိယ ဥက္ကဋ္ဌ စီမံကိန်းနှင့်ဘဏ္ဍာရေးဝန်ကြီးဌာန၊ ဒုတိယဝန်ကြီး ဦးမောင်မောင်ဝင်း က ပြည်ထောင်စုအဆင့် အဖွဲ့အစည်းများ ၊ ပြည်ထောင်စုဝန်ကြီးဌာနများ အနေဖြင့် ဘဏ္ဍာငွေ ရသုံးခန့်မှန်းခြေငွေစာရင်းများ ရေးဆွဲတင်ပြရာတွင် ငွေလုံးငွေရင်းနှင့် ပတ်သက်၍ လိုက်နာဆောင်ရွက်ရန် အချက်များကို ညွှန်ကြားထားပြီးဖြစ်ပါကြောင်း၊ တည်ဆောက် ရေး လုပ်ငန်းများ ဘဏ္ဍာရေးနှစ်အတွင်း ပြီးစီးရေး လိုက်နာဆောင်ရွက်ရမည့် ဘဏ္ဍာရေးစည်းမျဉ်း ၊ စည်းကမ်းများနှင့်ပတ်သက်၍ လည်းကောင်း ၊ ဆက်လက်၍ ကော်မတီ ဒုတိယ ဥက္ကဋ္ဌ ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးဝင်းဖေ က ကော်မတီ အနေဖြင့် ဆောင်ရွက်ရမည့် လုပ်ငန်းစဉ်များ ၊ စည်းမျဉ်း ၊ စည်းကမ်းများ၊ မူဝါဒများ နှင့်ပတ်သက်၍ လည်းကောင်း အသေးစိတ် ဆွေးနွေးပြောကြားပါသည်။

 ယင်းနောက် ဆောက်ရေးလုပ်ငန်း စိစစ်ညှိနှိုင်းရေးအဖွဲ့(ငွေလုံးငွေရင်း) အတွင်းရေးမှူး နှင့် ကော်မတီအဖွဲ့ဝင်များဖြစ်သည့် ပြည်ထောင်စုအဆင့်အဖွဲ့အစည်းများ နှင့် သက်ဆိုင်ရာ ပြည်ထောင်စု ဝန်ကြီးဌာနများမှ တာဝန်ရှိသူတို့က မိမိတို့နှင့် သက်ဆိုင်သည့် ကဏ္ဍအလိုက် အသီးသီး အကြံပြု ဆွေးနွေးတင်ပြမှုတို့အပေါ် ကော်မတီ ဉက္ကဋ္ဌ ၊ ပြည်ထောင်စုဝန်ကြီးက နိဂုံးချုပ် အမှာစကား ပြောကြားရာတွင် ပြည်ထောင်စု အဆင့်ဗဟို အဖွဲ့အစည်းများနှင့် သက်ဆိုင်ရာ ပြည်ထောင်စု ဝန်ကြီးဌာနများ အနေဖြင့် နိုင်ငံတော်ဘဏ္ဍာငွေဖြင့် ဆောင်ရွက်သည့် တည်ဆောက်ရေး လုပ်ငန်း များကို အရည်အသွေး ပြည့်မီအောင် တည်ဆောက်ရန်၊ နိုင်ငံတော် ဘဏ္ဍာငွေများကို လေလွင့် ဆုံးရှုံးမှု မရှိစေရန် ဘဏ္ဍာရေး စည်းမျဉ်း၊စည်းကမ်းများနှင့်အညီ လိုက်နာဆောင်ရွက်ရန်တို့ကို မှာကြားပြီး အစည်းအဝေးကို ညနေပိုင်းတွင် ရုပ်သိမ်းခဲ့ကြောင်း သိရှိရပါသည်။