မြန်မာ - ထိုင်း ချစ်ကြည်ရေးတံတားအမှတ်(၂) (သောင်းရင်းမြစ်) ဖွင့်ပွဲ အခမ်းအနား

နှစ်နိုင်ငံချစ်ကြည်ရင်းနှီးမှုနှင့် လမ်းပန်းဆက်သွယ်ရေးကဏ္ဍ ဖွံ့ဖြိုးတိုးတက်စေရန် အတွက် မြန်မာနိုင်ငံ(မြဝတီ) နှင့် ထိုင်းနိုင်ငံ(မဲဆောက်) တို့ကို ဆက်သွယ်သည့် သောင်းရင်းမြစ်ပေါ်၌ တည်ဆောက်ထားသော မြန်မာ - ထိုင်းချစ်ကြည်ရေးတံတားအမှတ်(၂) (သောင်းရင်းမြစ်) တံတား ဖွင့်ပွဲနှင့် Border Control Facilities (BCF) အဆောက်အဦနှင့် ပစ္စည်းကိရိယာများ လွှဲပြောင်း လက်ခံယူခြင်း အခမ်းအနားကို ၂၀၁၉ ခုနှစ် အောက်တိုဘာလ (၃၀) ရက်နေ့ နံနက်(၀၈:၃၀) အချိန်တွင် အဆိုပါတံတားပေါ်ရှိ ယာယီမင်္ဂလာမဏ္ဍပ်၌ ကျင်းပသည်။ အဆိုပါ အခမ်းအနားသို့ ဆောက်လုပ်ရေးဝန်ကြီးဌာန ၊ ပြည်ထောင်စုဝန်ကြီး ဦးဟန်ဇော် ၊ စီမံကိန်းနှင့်ဘဏ္ဍာရေးဝန်ကြီးဌာန ၊ ပြည်ထောင်စုဝန်ကြီး ဦးစိုးဝင်း ၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန ၊ ပြည်ထောင်စုဝန်ကြီး ဒေါက်တာသန်းမြင့်၊ ထိုင်းနိုင်ငံ ၊ ပို့ဆောင်ရေး ဝန်ကြီးဌာန ၊ ဝန်ကြီး H.E Mr. Saksayam Chidchob နှင့် အဖွဲ့ဝင်များ ၊ ကရင်ပြည်နယ်ဝန်ကြီးချုပ် ဒေါ်နန်းခင်ထွေးမြင့်နှင့် မွန်ပြည်နယ်ဝန်ကြီးချုပ် ဒေါက်တာအေးဇံ ၊ ပြည်နယ်အစိုးရအဖွဲ့ဝင် ဝန်ကြီးများ ၊ ဆောက်လုပ်ရေးဝန်ကြီးဌာန ၊ ဒုတိယဝန်ကြီး ဦးကျော်လင်းနှင့် ဌာနဆိုင်ရာ အကြီးအကဲများ ၊ လွှတ်တော်ကိုယ်စားလှယ်များ ၊ မြန်မာနိုင်ငံဆိုင်ရာ ထိုင်းနိုင်ငံသံအမတ်ကြီးနှင့် ထိုင်းနိုင်ငံဆိုင်ရာ မြန်မာနိုင်ငံသံအမတ်ကြီး ၊ နှစ်နိုင်ငံ တာဝန်ရှိပုဂ္ဂိုလ်များ ၊ ဖိတ်ကြားထားသည့်ဧည့်သည်တော်များ ၊ ဒေသခံပြည်သူများ တက်ရောက်ကြပါသည်။ အခမ်းအနားကို နှစ်နိုင်ငံ ချစ်ကြည်ရင်းနှီးမှုအထိမ်းအမှတ် ဆောင်ရွက်ချက်များကို Video Clip ဖြင့် ပြသဖွင့်လှစ်ပေးပြီး ထိုင်းနိုင်ငံ ၊ ပို့ဆောင်ရေးဝန်ကြီးဌာန ၊ လမ်းဦးစီးဌာန ညွှန်ကြားရေးမှူးချုပ် မှ စီမံကိန်းနှင့်ပတ်သက်၍ ရှင်းလင်းပြောကြားပါသည်။ ထို့နောက် မြန်မာနိုင်ငံ ၊ ဆောက်လုပ်ရေးဝန်ကြီးဌာန ၊ တံတားဦးစီးဌာန ၊ ညွှန်ကြားရေးမှူးချုပ် ၊ ဦးရွှေလေး က နှစ်နိုင်ငံ ချစ်ကြည်ရေးတံတား တည်ဆောက်ပေးမှုနှင့်စပ်လျဉ်း၍ ရှင်းလင်း ပြောကြားပါသည်။ ထို့နောက် ဆောက်လုပ်ရေးဝန်ကြီးဌာန ၊ ပြည်ထောင်စုဝန်ကြီး ဦးဟန်ဇော်က ကျေးဇူးတင် စကားပြောကြားရာတွင် မြန်မာနိုင်ငံနှင့် ထိုင်းနိုင်ငံတို့ဟာ ကုန်း ၊ ရေ နယ်နိမိတ်ထိစပ်နေတဲ့ အိမ်နီးချင်းအာဆီယံအဖွဲ့ဝင်နိုင်ငံများ ဖြစ်သလို နှစ်ရှည်လများ အပြန်အလှန် ချစ်ကြည်ရင်းနှီးစွာ ကူးလူးဆက်ဆံလျက်ရှိကြပြီး တစ်နိုင်ငံနှင့်တစ်နိုင်ငံ မိတ်ဖက်နိုင်ငံများလည်းဖြစ်ပါကြောင်း၊ နှစ်နိုင်ငံကြား ကုန်သွယ်ရေး ၊ စီးပွားရေးနှင့် ခရီးသွားလာရေးလုပ်ငန်းများ ၊ ရင်းနှီးမြှုပ်နှံမှုနှင့် အလုပ်သမားရေးရာ ကိစ္စရပ်များကို တိုးမြှင့် ဆောင်ရွက်လျက်ရှိပါကြောင်း။ မြန်မာနိုင်ငံရဲ့သံတမန်ဆက်ဆံရေးကို အစဉ်အလာအရ ချစ်ကြည်ရင်းနှီးတဲ့ အိမ်နီးချင်းနိုင်ငံ များနှင့် ဆက်ဆံရေး ပိုမိုခိုင်မာလာစေရေးအတွက်သာမက ကမ္ဘာ့နိုင်ငံများနှင့် ချစ်ကြည်ရင်းနှီးမှု တည်ဆောက်ရေး ၊ အာဆီယံနှင့်ဒေသဆိုင်ရာ အဖွဲ့အစည်းများတွင် တက်ကြွစွာပါဝင်ပြီး နိုင်ငံတော်၏ အကျိုးတူစီးပွားသာမက ဒေသ အကျိုးစီးပွားအတွက် ဆောင်ကြဉ်းပေးနိုင်ရေး ၊ မိမိတို့နိုင်ငံ၏ အခြေအနေနှင့် ဦးစားပေးလိုအပ်ချက်များနှင့်အညီ ကုလသမဂ္ဂနှင့် နိုင်ငံတကာအဖွဲ့အစည်းများ အားလုံးနှင့် ဆောင်ရွက်လျက်ရှိပါကြောင်း။ မြန်မာနိုင်ငံနှင့် ထိုင်းနိုင်ငံတို့ နှစ်နိုင်ငံနယ်စပ်ကုန်သွယ်ရေး ပူးတွဲကော်မတီ (JBTC) ဖွဲ့စည်း ထားရှိပြီး ကုန်သွယ်မှုမြှင့်တင်ရေး၊ ကုန်သွယ်မှု လွယ်ကူလျင်မြန်ချောမွေ့စေရေးအတွက် ကုန်သွယ်မှု ဆိုင်ရာ ဖြေလျှော့မှုများ ဆောင်ရွက်လျက်ရှိပါကြောင်း။ မြန်မာနိုင်ငံနှင့် ထိုင်းနိုင်ငံတို့ရဲ့ အဓိကကုန်သွယ်မှုလမ်းကြောင်းတွေမှာ တစ်နှစ်ထက်တစ်နှစ် တိုးတက်များပြားလာခဲ့လို့ သယ်ယူပို့ဆောင်ရေးမြန်ဆန်လာဖို့ လိုအပ်လျက်ရှိပါကြောင်း ၊ မြန်မာနိုင်ငံ ၊ မြဝတီမြို့နဲ့ ထိုင်းနိုင်ငံ ၊ မဲဆောက်မြို့တို့အကြား ကုန်သယ်မှု လမ်းကြောင်းမှာရှိတဲ့ အမှတ်(၁) ချစ်ကြည်ရေးတံတားဟာဆိုရင် နှစ်နိုင်ငံ ကုန်သွယ်ရေးမော်တော်ယာဉ်များ တိုးတက်များပြားလာခဲ့လို့ ယခု အမှတ်(၂) ချစ်ကြည်ရေးတံတားကို ထိုင်းနိုင်ငံအစိုးရအကူအညီဖြင့် တည်ဆောက်ပေးဖို့ ညှိနှိုင်းခဲ့ပြီး ၂၀၁၉ ခုနှစ် မတ်လ (၁၉) ရက်နေ့တွင် ထိုင်းနိုင်ငံဘက်မှ ဝန်ကြီးချုပ် Mr. Prayut Chan-o-cha နှင့် မြန်မာနိုင်ငံဘက်မှ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် တို့ တက်ရောက်၍ တံတားပြီးမြောက်ခြင်းအခမ်းအနားအား ကျင်းပခဲ့ပါကြောင်း။ ဒီတံတားကြီး တည်ဆောက်ပေးနိုင်အောင် ဆောင်ရွက်ခဲ့တဲ့ ထိုင်းနိုင်ငံအစိုးရ ၊ ပို့ဆောင်ရေး ဝန်ကြီးဌာနအောက်ရှိ လမ်းဦးစီးဌာနမှ တည်ဆောက်သူ ကျွမ်းကျင်ပညာရှင်များ ၊ ကူညီပံ့ပိုးပေးသူ များအား အထူးကျေးဇူးတင်ရှိပါကြောင်း ၊ မကြာသောကာလတွင် မြန်မာ - ထိုင်း ချစ်ကြည်ရေး တံတားအမှတ်(၂)ပေါ်မှာ စိတ်အေးချမ်းသာစွာ သွားလာအသုံးပြုနေကြတဲ့ နှစ်နိုင်ငံပြည်သူများကို တွေ့မြင်ရတော့မှာ ဖြစ်ပါကြောင်း။ မြန်မာပြည်သူများနှင့်အတူ ထိုင်းနိုင်ငံသူ နိုင်ငံသားများမှလည်း အေးချမ်းသာယာပြီး ပြည့်စုံ ကုံလုံပေါကြွယ်ဝတဲ့ အနာဂတ်ဆီသို့အတူ လျှောက်လှမ်းနိုင်ပါစေလို့ ဆုမွန်ကောင်းတောင်းအပ်ပါ ကြောင်း ပြောကြားပါသည်။ ၎င်းနောက် ထိုင်းနိုင်ငံ၊ ပို့ဆောင်ရေးဝန်ကြီးဌာန၊ ဝန်ကြီး H.E Mr. Saksayam Chidchob က ဝမ်းမြောက်ကြောင်း နှုတ်ခွန်းဆက်စကားပြောကြားပါသည်။ ထို့နောက် မြန်မာနိုင်ငံဘက်မှ ဆောက်လုပ်ရေးဝန်ကြီးဌာန ၊ ပြည်ထောင်စုဝန်ကြီး ဦးဟန်ဇော် ၊ စီမံကိန်းနှင့်ဘဏ္ဍာရေးဝန်ကြီးဌာန ၊ ပြည်ထောင်စုဝန်ကြီး ဦးစိုးဝင်း ၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ၊ ပြည်ထောင်စုဝန်ကြီး ဒေါက်တာသန်းမြင့်၊ ကရင်ပြည်နယ် ဝန်ကြီးချုပ် ဒေါ်နန်းခင်ထွေးမြင့် ၊ ထိုင်းနိုင်ငံဆိုင်ရာ မြန်မာသံအမတ်ကြီး ဦးမျိုးမြင့်သန်း နှင့် ထိုင်းနိုင်ငံဘက်မှ ပို့ဆောင်ရေးဝန်ကြီးဌာန ၊ ဝန်ကြီး H.E Mr. Saksayam Chidchob နှင့် တာဝန်ရှိသူ တို့က မြန်မာ - ထိုင်း ချစ်ကြည်ရေးတံတားအမှတ် (၂) (သောင်းရင်းမြစ်) တံတားအား ဖဲကြိုးဖြတ် ဖွင့်လှစ်ပေးပြီး နှစ်နိုင်ငံ အထိမ်းအမှတ်လက်ဆောင်များ အပြန်အလှန်ပေးအပ်ပြီး အမှတ်တရ စုပေါင်းမှတ်တမ်းတင်ဓါတ်ပုံရိုက်ကူးကြသည်။ ၎င်းနောက် နှစ်နိုင်ငံဝန်ကြီးများသည် နှစ်နိုင်ငံပူးပေါင်းကူးလူးဆက်သွယ်ရေး သမိုင်း စာမျက်နှာသစ်ကို ဖွင့်လှစ်ပေးသည့်အနေဖြင့် တံတားကြီးပေါ်မှ ကုန်စည်ပို့ဆောင်ရေးယာဉ်များ ဖြတ်သန်းမှုအား ကြည့်ရှုအားပေးပါသည်။ ဆက်လက်၍ အစီအစဉ် ဒုတိယအပိုင်း Border Control Facilities (BCF) အဆောက်အဦနှင့် ပစ္စည်းကိရိယာများ လွှဲပြောင်းလက်ခံယူခြင်းအခမ်းအနားကို ကျင်းပရာ ထိုင်းနိုင်ငံ ၊ ပို့ဆောင်ရေး ဝန်ကြီးဌာန ၊ လမ်းဦးစီးဌာန ၊ ညွှန်ကြားရေးမှူးချုပ်က စီမံကိန်းနှင့်ပတ်သက်၍ ရှင်းလင်းတင်ပြသည်။ ထို့နောက် ထိုင်းနိုင်ငံ ၊ နိုင်ငံခြားရေးဝန်ကြီးဌာန ၊ အရှေ့အာရှရေးရာဌာန ၊ ဒုတိယညွှန်ကြား ရေးမှူးချုပ်က မြန်မာနိုင်ငံဘက်ခြမ်း Border Control Facilities (BCF) အဆောက်အဦနှင့် ပစ္စည်း ကိရိယာများ ထောက်ပံ့ပေးအပ်ခြင်းနှင့်ပတ်သက်၍ ရှင်းလင်းပြောကြားပါသည်။ ၎င်းနောက် မြန်မာနိုင်ငံ၊ ဆောက်လုပ်ရေးဝန်ကြီးဌာန၊ လမ်းဦးစီးဌာန ၊ ညွှန်ကြားရေးမှူးချုပ် ၊ ဦးအုန်းလွင် က နှစ်နိုင်ငံ လမ်းပန်းဆက်သွယ်ရေးကဏ္ဍ ဖွံ့ဖြိုးတိုးတက်ရေးအတွက် ဆောင်ရွက်ချက် များနှင့်ပတ်သက်၍ ရှင်းလင်းပြောကြားပါသည်။ ယင်းနောက် Border Control Facilities (BCF) အဆောက်အဦ ကမ္ဗည်းမော်ကွန်းအား မြန်မာနိုင်ငံ ၊ ဆောက်လုပ်ရေးဝန်ကြီးဌာန ၊ ပြည်ထောင်စုဝန်ကြီး ဦးဟန်ဇော် နှင့် ထိုင်းနိုင်ငံ ၊ ပို့ဆောင်ရေးဝန်ကြီးဌာန ၊ ဝန်ကြီး H.E Mr. Saksayam Chidchob တို့က စက်ခလုတ်နှိပ် ဖွင့်လှစ် ပေးပြီး မြန်မာဘက်ကမ်း Border Control Facilities (BCF) အား လွှဲပြောင်းပေးအပ်ပါသည်။ ထို့နောက် နှစ်နိုင်ငံဝန်ကြီးများနှင့် ဧည့်သည်တော်များသည် အမှတ်တရ စုပေါင်းမှတ်တမ်းတင် ဓါတ်ပုံရိုက်ကူးပြီး မြန်မာ - ထိုင်း ချစ်ကြည်ရေးတံတားအမှတ်(၂) (သောင်းရင်းမြစ်) တံတားဖွင့်ပွဲနှင့် Border Control Facilities (BCF) အဆောက်အဦနှင့် ပစ္စည်းကိရိယာများ လွှဲပြောင်းပေးအပ်ပွဲ အခမ်းအနားကို အောင်မြင်စွာကျင်းပပြီးစီးခဲ့ပါသည်။ မြန်မာ-ထိုင်း ချစ်ကြည်ရေးတံတားအမှတ်(၂) (သောင်းရင်းမြစ်)သည် မြန်မာနိုင်ငံ(မြဝတီ)နှင့် ထိုင်းနိုင်ငံ(မဲဆောက်) တို့ကို ဆက်သွယ်ကာ သောင်းရင်းမြစ်ကို ဖြတ်ကျော်တည်ဆောက်ထားပြီး တံတားအရှည် (၇၆၀) မီတာ ၊ တံတားအကျယ် (၁၇.၂) မီတာ ရှိသည့် ကြိုတင်အားဖြည့်သံကူ ကွန်ကရစ် ၊ Box Girder နှစ်လမ်းသွား တံတားဖြစ်ကာ နှစ်ဖက်ချဉ်းကပ်လမ်းများ ၊ Border Control Facilities (BCF) များနှင့် Traffic Change Over စသည်တို့ ပြည့်စုံစွာထည့်သွင်းပြီး အဆင့်မြင့် နည်းပညာ (High Technology) များ အသုံးပြု၍ စံချိန်စံညွှန်း အရည်အသွေးကောင်းမွန်စွာဖြင့် တည်ဆောက်ထားသော တံတားတစ်စင်းဖြစ်သည်။ ဒီတံတားကြီးဟာ မြန်မာ - ထိုင်းနှစ်နိုင်ငံ ဆက်သွယ်ရေးသာမက ဗီယက်နမ်နိုင်ငံ ၊ ဒါနမ်မြို့ နှင့် မြန်မာနိုင်ငံ ၊ မော်လမြိုင်မြို့တို့ကို ဖြတ်သန်းဆက်သွယ်သည့် အရှေ့-အနောက် စီးပွားရေးစင်္ကြံလမ်း (East – West Economic Corridor) ပေါ်မှာ ကျရောက်နေတာဖြစ်လို့ ဒေသတွင်းနိုင်ငံများရဲ့ ကုန်သွယ်စီးပွားရေးတွေကို များစွာအကျိုးရှိစေမှာ ဖြစ်ပါသည်။ မြန်မာ - ထိုင်း ချစ်ကြည်ရေးတံတား အမှတ်(၂) (သောင်းရင်းမြစ်) တံတားကြီးအား အသုံးပြု နိုင်ခြင်းအားဖြင့် မြန်မာနိုင်ငံနှင့် ထိုင်းနိုင်ငံ နှစ်နိုင်ငံချစ်ကြည်ရင်းနှီးမှု ပိုမိုတိုးတက်လာစေပြီး နှစ်နိုင်ငံ ကုန်စည်စီးဆင်းဖလှယ်မှုများ လွယ်ကူချောမွေ့လာစေခြင်းဖြင့် ပြည်သူများ၏ စီးပွားရေး ၊ လူမှုရေး ၊ ကျန်းမာရေး စသည့်ကဏ္ဍများတွင် ဘက်စုံဖွံ့ဖြိုးတိုးတက်လာနိုင်ပြီး ဒေသခံများ၏ လူနေမှု အဆင့်အတန်း ဖွံ့ဖြိုးတိုးတက်လာစေမှာ ဖြစ်ပါသည်။ ထို့အပြင် တံတားကြီးမှတစ်ဆင့် အာဆီယံနိုင်ငံများအကြား လမ်းပန်းဆက်သွယ်မှု လွယ်ကူ ချောမွေ့လာခြင်းတို့ကြောင့် အာဆီယံနိုင်ငံအချင်းချင်း ချစ်ကြည်ရင်းနှီးမှု ပိုမိုလာခြင်း ၊ ယဉ်ကျေးမှုများ ဖလှယ်နိုင်ခြင်း ၊ ကုန်စည်စီးဆင်းမှုများလွယ်ကူလာစေခြင်း နှင့် ဒေသတွင်း ခရီးသွားလုပ်ငန်း ဖွံ့ဖြိုးတိုးတက်မှုကိုလည်း များစွာ အထောက်အကူပြုစေမှာ ဖြစ်ပါသည်။